Ndirikanaga gĩtang’a kĩmwe gĩetagwo Wahũga ngarana wakwa ngerirĩria narĩ korwo nĩatũũraga. Ũyũ mũthuuri nĩwe warĩ ithe wa baba no ndacihũnga wega njiguaga cũcũ aagĩire ihu rĩa awa athiĩte gũtua ithanjĩ rĩa kũgita. No magĩgakinya gũtũũra gũkũ Icangware maumĩte mĩrĩmo mĩingĩ makĩũrĩra ng’aragu yarĩ kuo yetagwo ng’aragu ya Gĩthioro kana ng’aragu ya Kĩmotho mwaka-inĩ wa 1918. Maakinya magĩkora mũthuuri wetagwo Mang’ũriũ nĩwe warĩ mwene ngamba ĩyo. Guka akĩmũthĩnjĩra mbũri ya ndarwa nĩguo egwatĩre gĩthaka na rĩrĩa oonirio ha gwaka akĩruga njohi ya kũrugũria nyũmba. Thuutha wa thikũ nini agĩtĩkĩrĩka nĩ athuuri a itũũra rĩu hĩndĩ ĩrĩa aamathĩnjĩire mbũri ya gĩikaro na akĩheana ĩngĩ yetagwo ya rũteere. Mang’ũriũ akĩmaciara na mbũri na magĩtuĩka a kũu.